Tölfræði varðandi erlenda íbúa í Sveitarfélaginu Hornafirði
Miðað við tölur sem teknar voru saman 30. maí sl., er fjöldi íbúa í Sveitarfélaginu Hornafirði 2650 manns. 1851 manns búa í póstnúmerinu 780, 527 manns í póstnúmerinu 781 og 272 í póstnúmerinu 785. Af heildartölu íbúa í sveitarfélaginu, eru 836 einstaklingar með erlent ríkisfang sem gera 31,5% íbúa, en prósenta þessi er virkilega breytileg eftir póstnúmerum. Í póstnúmerinu 780 eru íbúar með erlent ríkisfang 23,5% heildarfjölda, í 781 er talan töluvert hærri, 38,9% og í 785 er prósenta fólks með erlent ríkisfang 71,7%.
Fólk frá Póllandi er fjölmennasti hópurinn í öllum þremur póstnúmerum sveitarfélagsins og búa nú 261 manns hér með pólskt ríkisfang. Rúmenar eru næstfjölmennastir í bæði 781 og 785, en í 780 er það fólk með króatískt ríkisfang.
Í Sveitarfélaginu Hornafirði býr fólk frá 46 löndum og frá öllum heimsálfum (nema Suðurskautslandi blessunarlega) sem er dýrmætt fyrir sveitarfélagið í ljósi þess að fjölbreytileikinn býður upp á meiri möguleika til uppbyggingar.
Anna Birna Elvarsdóttir, verkefnastjóri fjölmenningar- og gæðamála, tók tölfræðina saman.
| Fólk | Sveitarfélagið allt | Póstnúmerið 780 | Póstnúmerið 781 | Póstnúmerið 785 |
| Íslensk ríkisföng | 1814 | 1415 | 322 | 77 |
| Erlend ríkisföng | 836 | 436 | 205 | 195 |
| Samtals | 2650 | 1851 | 527 | 272 |
| % Ísl. Ríkisföng | 68,45% | 76,45% | 61,10% | 28,31% |
| % Erl. Ríkisföng | 31,55% | 23,55% | 38,90% | 71,69% |